Gipuzkoako Foru Aldunditik adierazi dutenez, bisitariek, Arditurrin antolatzen dituzten bisita gidatuen bitartez, indusketa lanen nondik norakoak bertatik bertara ezagutzeko aukera izango dute. Udan indusketak meategi barruan egingo dituzte, udazkenetik aurrera, berriz, kanpoaldean. Lanak 2010 urte arte luzatuko dira. Proiektua garatzeko 692.493 euro bideratu dituzte. Finantzaketan Gipuzkoako Foru Aldundiak, Eusko Jaurlaritzako Ingurumen Sailak, Behemendi lan garapen elkarteak eta Oiartzungo Udalak hartuko dute parte.
Arditurri eta Aiako Harriaren ingurua erromatarrak Gipuzkoan izan ziren adierazgarri nagusienetako bat dira, bertan izan zuten meatzaritza jarduera garrantzitsua dela medio. Arditurriko meategietako aztarnez gain, Oiasso hiri erromatarra ere Erromako inperioak eskualde honetan utzitako arrastoaren seinale dira.
Meategietako jardunak ez zuen XIX. mendea bitartean etenik izan, bai haizeolak - XIV. mendea arte-, bai burdinolak martxan izateko meategietatik mineralak ateratzen jarraitu baitzuten. Mendetako ustiaketaren ondoren, 1984. urtean erabaki zuten meategiak ixtea.
Meategiak oraindik zabalik zirela hasi zituzten arkeologia azterketak, 1983. urtean. Hasiera batetan, erromatarrek arrastoa utzitako bederatzi galeria topatu zituzten Arditurrin, aztarnategiak, ordea, ugarituz joan ziren eta guztiak, Aiako Harriaren izendapenean barneratu zituzten 1987an.
1997an arkeologia lanei ekin zieten berriro eta erromatarren hainbat tresna berreskuratu zituzten. 2002an, utzita zeuden meategiak aztertu eta meategian pilatutako ura ateratzeko eraiki zuten galeria izan zen topatu zuten aurkikuntza nagusietako bat.
Herritarrek Arditurriko meategietan barneratzeko aukera dute egun, Arditurriko interpretazio zentroan gehienez 20 laguneko taldeak osatzen baitituzte bisitak antolatzeko. Behin bisitariek, kaskoa, argiztapena, eskularruak eta oinetako aproposak jantzita dituztela, espeleologo batek gidatzen ditu meategitik barrena. Erromatarrek garaian egindako meatze lanak ikuskatzen eta arkeologoen egungo ikerketa lana ezagutzen dute bisitariek.
